اللهم ما اجعله خير
خير اللهم اجعله خير ..قال ايه انا كنت ماشى فى صحراء فاضيييييييه والسراميك فيها بيلمعععععع .بصيت على يمينى لقيت جمل بيلعب اتارى ما تبحلقش انا كمان استغربت بس بينى وبينك عملت مش واخد بالى المهم ماكترش عليك فى الكلام قول كتر ..حسيت ان الجذمه وجعتنى رحت قلعتها ومن ساعتها والشمس امال تضرب فى راسى شويه كده وبصيت لقيت تلفزيون قديم رحت ماسك التلفزيون وبمسح التراب اللى على الشاشه إلا واسمعلك صوت بيقول : شبيك لبيك عفريت مترب بين ايديك
العفريت : نفسك فى ايه؟
انا : كامننا
العفريت : باستغراب ..بتقول ايه ؟
انا: وظيفه حلوه فى بلدنا واتجوز بنت احلى ويبقى معايا فلوس كتير
العفريت : بس الوظيفه عايزه واسطه
انا: امال انت شغلتك ايه
العفريت : وانا لو معايا واسطه كان ايه اللى يذلنى لواحد زيك
انا : خلاص بس من غير غلط اما انت عفريت فقرى صحيح
العفريت : اطلب حاجه غيرها
انا : عايز فلوس كتير ..ومتعمليش زى محمد هنيدى فى عفروتو وتروح تجيبلى جنية وربع
العفريت : وانت فاكر انى لو معايا فلوس كنت قعدت فى التلفزيون الابيض واسود ده ..مش كنت شوفتلى تلفزيون ملون او عزلت ونقلت فى ريسيفر
انا : خلاص بقى ..انا عايز اتجوز وإلا هرميلك التلفزيون فى الترعه واخلى البلهارسيا تنحر فى جتتك
العفريت : لأ ابوس ايدك إلا التلفزيون ده انا مصدقت
انا : ما صدقت ايه؟؟؟
العفريت : اصل خطيبتى اشترطت عليا انا اللى اجهز الشقه واجيب كل الاجهزه الكهربائيه
.انا : خلاص بناقص التلفزيون
العفريت : بكل اسى ..ماهو انا ماجبتش غيره
انا : تصدق انت صعبت عليا ..ورأفة بيك انا هقوم من النوم ومش هكمل الحلم ده
اييييييييييييييييه عملنا بنى آدمين جعنا ..عملنا عفاريت هنموت من الجوع يبقى احنا نمشيها شيكا بيكا يا صاحبى لغاية ما تفرج
هناك تعليقان (٢):
raw3a raw3a raw3a,bgd 2slobak raw3aaaaaa bgd we 7atla2eny 3amla comment 3ala kol 2l mawadi3 fa balash teb5al 3alaya ba2a:))
haaaa 7ata 2l 3afritt msh 3arf ytgawiz,omal a7na 7ane3mil 2h bs
yala kolo 3ala rbna 7ane3mil 2h bs
yala 2l mohm an 2l kalam 3agabny awy
3ayza ashof ta3li2:))
اهلا رورو
مشاركتك هى الاروع
شفتى ازاى حتى العفاريت المصريه لا عارفه تتجوز ولا عارفه تعيش
شكلنا كده هنفضل نتفرج على مسرحية المتزوجون طول عمرنا وخلاص هههههههه
انا شفت مدونتك وهى رائعه جدا خسارة انى ملحقتهاش من الاول
كل مواضيعك تحفه
وشكرا لان مدونتى عجبتك
إرسال تعليق