ضحك ..ولعب ..وجد ..وحب

ضحك

لعب

جد

حب لسة الطيور بتطن والنحليات بتزن والطفل ضحكه يرن مع ان

مش كل البشر

فرحانين

الطريق

كل واحد مننا له سكه

شايف الدنيا بنظرته هو الخاصة

العالم ما هو غير الافكار والتصورات اللى فى خيالنا عنه

فلان ده طيب ..لانى شايفه طيب

نفس الفلان ده مش طيب ..لان غيرى شايفه مش طيب

الدنيا حوالينا هى هى

لكن الحقيقة مش واحدة

ليه؟

معرفش

مش عارف ليه كل ما ارفع عينى من على الارض وابص فى وشوش الناس بخاف

مش بخاف منهم

بخاف من الالف حقيقة اللى فى وشوشهم

والالف قصة

والالف سكة

كل واحد عباره عن عالم خاص لوحده

له آلامه وله آماله الخاصة به

الغريب اننا مش بنحس بألم غيرنا

ممكن نتأثر ونتعاطف ..ولكننا لا نمنح الاخرين اكثر من مجرد لحظة شجن

ونمضى فى طريقنا ..وكل شئ يصبح بالنسبة لنا عادى

انا اتألم

وانت كمان بتتألم

ومع ذلك برضه لسه سكتك غير سكتى

وسكتى غير سكتك

وسكتى شايفها طويله

ومملة

وغصب عنى لازم امشيها

امشيها للاخر

بس محدش يحاسبنى ولا يسألنى انا وصلت لفين

لانى معرفش غير انى ..ماشى

ملحوظة : انا متضايق علشانك اكمنك دلوقتى بتسألى نفسك انا ايه اللى جابنى هنا

ما تزعلش بمجرد ما هتغير من المدونة لمدونة تانى هتنسى اليوم اللى شفت فيه وش ام المدونة دى

سلام

وانااااااا على الربابة بغني

محاكمة مواطن

مين فينا مش بيحب مصر؟ وبرضة من فينا مش بيكرهها؟

عمرى ما سمعت عن شعب بيعلن حبه وكراهيته لوطنه زى المصريين

ده طبعا من عشمنا فيها ..إيوه إيوه ماني فاهم

انما البلد دى ذنبها ايه يا جدعان

هينط واحد يقول : احنا بنحب الخير اللى فيها وناسها الطيبة وبنكره الشر اللى فيها والناس اللى موش طيبة

ويا عينى عليكى يا طيبة لما بتضيعى منا

طب ماهو الشر ده والناس اللى مش طيبة دول ..خواجات ولا هبطوا من السماء

مش برضه هم مصريين

وليه دايما نتكلم عن الناس الوحشة اللى مش طيبين وشريره وكأننا احنا الطيبين

طب لما انت طيب وانا طيب وكل سنة وانت طيب ..امال الشر جه منين؟

الغلط فين؟

الحقيقة ان الغلط جماعى

ولان كلنا بنرتكب الغلط "غلطة رجل واحد" فقد ضاعت الجريمة وتفرق دم الضحية بين القبائل

لأ لأ ..اوعى حد يعملي فيها الملاك البرئ ابو قلب طيب اوى ..انا معايا الدليل اللى يثبت جريمتكم

سيدى الرئيس "طبعا وهمى لان كلنا مجرمين" حضرات المستشارين "برضه وهميين زى الريس يعنى مش محتاجه كلام" انظروا الى هذا الشعب ..انظروا الى هذا المواطن الغلبان ذو البشرة السمراء الكادحة الكالحة وهذا القفا الذى اكل عليه الدهر وشرب بيبسى كانز

لقد سولت له نفسه ان يصور لها ولغيره اننا نعيش فى زمن الذئاب فى زمن "اخطف واجرى" فى زمن "اتعشى بيه قبل ما يتغدى بيك" ده ان لقى فيك حاجه تتاكل اصلا -انه يفعل ذلك لا ليواسى نفسه او يعاتب الزمان وانما ليوجد لنفسه المبرر والدافع لارتكاب الجريمة - يتهم جميع الموظفين بالرشوة رغم انه موظف وما ذلك إلا ليبرر لنفسه اخذ الرشوة - يسب ويلعن المحسوبيات وهو الذى يخرج من طابور العيش ليقول "والنبى يا عم محمد سيبك من الناس دى ومشينى انا الاول" وكأن الناس الواقفة دول كانوا خدامين ابوه فى الوسية بتاعتهم

ان هذا المواطن الغلبان ذو البشرة الكالحة -له عند واحد معرفة عشرة جنية سلف اعطاها له منذ خمس سنوات - ولكنه ينسى الالف جنية التى عليه لصالح غيره ولم يمضى عليها بضعة اسابيع

هذا المواطن الذى يتحدث عن استغلال التجار للمواسم ورفع الاسعار هو احد هؤلاء التجار

دائما يتحدث عن طمع الناس وهو سائق ميكروباص اجره لا يمكن يتعتع من موقفه غير لما يكمل الكرسى اربعات اربعات

يتحدث عن ذهاب الاخلاق وضياع القيم لكنه اذا شاهد عجوز فى المواصلات - لا اقول انه لا يقف له ليجلسه مكانه - بل يسخر ممن يفعل ذلك ويقول في نفسه "ده باين عليه اريافجى ومش من هنا..يابنى اقعد الناس بطلت تعمل الكلام ده" ونسى انه واحد من هؤلاء الناس الذين بطلوا يقوموا للراجل المسن او الست ..خاصة الست يقولك تستاهل خليها تقف خليها تستحمل علشان يعرفوا ويشوفوا القرف اللى احنا فيه ..نسى هذا المواطن الغلبان ذو البشرة السمراء الكالحة انه نزلت للشغل من فقره الفقرى ابن الفقرية - وانها لو قعدت من الشغل فإن اكثر من نصف الاسر المصرية هتبات من غير عشاء

ان هذا المواطن الكالحة ذو البشرة الغلبان ..مطرب فلق دماغنا "يبقى انت اكيد فى مصر" وفى النهاية يتضح انه مجرم ومزور وهربان من الخدمة العسكرية

ثم بعد ذلك يذهب ليسامر على احدى المقاهى "المشروع الاكثر نجاحا وربحا فى مصر" لينفث دخانه فى الهواء وهو يتحدث عن الفساد وضياع الاخلاق ونسى انه -" من اعمالكم سلط عليكم" -ان فسادك ايها المواطن هو الذى سمح للاخرين بالفساد ..وكلما ظهر الفساد اكثر على السطح وبقى عينى عينك فهذا يعنى انك اكثر منهم فساد "وكأنهم ماسكين عليك زلة..سيب وانا سيب" يعنى هو كان معقول حد يتبجح بالفساد كده ويظاهر به ولا يعمل لك اى حساب إلا اذا كنت انت اكثر منه فسادا

ولعل هذا المواطن يتسائل وكيف اكون اكثر منه فسادا وفى نفس الوقت اكثر منه فقرا "ده من خيبتك " لانك السكوت عن الفساد هو الذى يعد فسادا اكبر من الفساد نفسه

وختاما ارجو من عدالة المحكمة ان تقضى ببراءة هذا المواطن الغلبان ذو البشرة الكالحة لانه ارتكب جريمة ارتكبناها جميعا

المرافعة انتهت

وزى مانتم شايفين لان كلنا مجرمين فمش عارفين نحدد مين هم الناس الوحشين فى بلدنا لان كلنا شاركنا فى الجريمة وكلنا لما نيجى نقول اننا بنكره البلد ونلعن سلسفين ابو ام اللى جابت امها لازم نفتكر اننا احنا السبب واحنا المجرمين

وابقى قابلونى لو حد فيكم فلح او شفتوا خير فى البلد دى ..والخير هييجى ازاى وانت فعلك عكس قولك

انا بس حبيت اوضحلكم الغلط فين ومين هم الناس الوحشين

كلكم وحشين ما عدا انا

ده شعارى وشعار كل مواطن ..كل الناس وحشة إلا هو

فوتكم بعافيه

.

.

.

.

وانا على الربابة بغنى ماملكش غير انى اغنى واقول ..تعيشى يا مصر

جواز اونطه ..رسم فى رسم

الجواز ده كله رسم فى رسم

عارف هتسألنى ازاى؟

تلاقي الراجل بيتجوز واحده زكائها اقل منه علشان يرسم عليها دور العبقرى لانه بغبائها يضمن احتياجها له ولذكائه وحسن تصرفه فى المواقف الحياتيه

المهم انه يكون فيها نقص فى اى شئ

ذكاء

طول

مقاس جزمتها يضحك

لما بتتكلم شفايفها بتدور فى الهواء زى الكوتش

المهم يكون فيها عيب والسلام

لان ده اللى هيحسسه برجولته

ايون ..امال هو هيكون راجل ازاى إلا اذا كان متفوق عليها فى النقص ده

ويفضل كده ذاللها العمر كله ان عطف عليها واتجوزها

فاكرين فيلم الرجال لا يتزوجون الجميلات

لما بطل الفيلم اتخانق مع مراته او طلقها لانها عملت عملية تجميل فى انفها الطويل

لانها كده اصبحت جميله وكل الرجاله هيبصولها

وهى بعد ما كانت فرحانه بالفتى الاول الدنجوان اللى كانت متجوزاه

هتبوصله وتقول : يا حسره انا كان ليه بس استعجلت واتجوزتك

انا عارفه اخدتك على ايه..لو بس هو النصيب الاعمى

الغريب والعجيب يقول ابن الشنكوتى فى كتاب يا وحشة يا بلحه يا معطنه اتجوزتى قبل اخواتك الاربعه

ان الجوزه السعيده هى التى تشعر بنقص وحاجتها الدائمه الى سبع البرومبه جوزها علشان يكمل النقص ده وتفتخر به ازاى هى يا معيوبه قدرت تسد العيب ده بحيطه ..قصدى براجل والسلام

وكايده العزال انا من يومى ..ايوه اه

طبعا فيه ناس(اخوات) هتقول الراجل اللى يفكر كده يبقى مريض وناقص

يا ستى ..ده الموجود فى السوق انا كان عاجب

اللهم اجعله خير

اللهم ما اجعله خير
خير اللهم اجعله خير ..قال ايه انا كنت ماشى فى صحراء فاضيييييييه والسراميك فيها بيلمعععععع .بصيت على يمينى لقيت جمل بيلعب اتارى ما تبحلقش انا كمان استغربت بس بينى وبينك عملت مش واخد بالى المهم ماكترش عليك فى الكلام قول كتر ..حسيت ان الجذمه وجعتنى رحت قلعتها ومن ساعتها والشمس امال تضرب فى راسى شويه كده وبصيت لقيت تلفزيون قديم رحت ماسك التلفزيون وبمسح التراب اللى على الشاشه إلا واسمعلك صوت بيقول : شبيك لبيك عفريت مترب بين ايديك

العفريت : نفسك فى ايه؟

انا : كامننا

العفريت : باستغراب ..بتقول ايه ؟

انا: وظيفه حلوه فى بلدنا واتجوز بنت احلى ويبقى معايا فلوس كتير

العفريت : بس الوظيفه عايزه واسطه

انا: امال انت شغلتك ايه

العفريت : وانا لو معايا واسطه كان ايه اللى يذلنى لواحد زيك

انا : خلاص بس من غير غلط اما انت عفريت فقرى صحيح

العفريت : اطلب حاجه غيرها

انا : عايز فلوس كتير ..ومتعمليش زى محمد هنيدى فى عفروتو وتروح تجيبلى جنية وربع

العفريت : وانت فاكر انى لو معايا فلوس كنت قعدت فى التلفزيون الابيض واسود ده ..مش كنت شوفتلى تلفزيون ملون او عزلت ونقلت فى ريسيفر

انا : خلاص بقى ..انا عايز اتجوز وإلا هرميلك التلفزيون فى الترعه واخلى البلهارسيا تنحر فى جتتك

العفريت : لأ ابوس ايدك إلا التلفزيون ده انا مصدقت

انا : ما صدقت ايه؟؟؟

العفريت : اصل خطيبتى اشترطت عليا انا اللى اجهز الشقه واجيب كل الاجهزه الكهربائيه

.انا : خلاص بناقص التلفزيون

العفريت : بكل اسى ..ماهو انا ماجبتش غيره

انا : تصدق انت صعبت عليا ..ورأفة بيك انا هقوم من النوم ومش هكمل الحلم ده

اييييييييييييييييه عملنا بنى آدمين جعنا ..عملنا عفاريت هنموت من الجوع يبقى احنا نمشيها شيكا بيكا يا صاحبى لغاية ما تفرج